ភ្នំពេញ៖ ព្រះមហាក្សត្រនៃព្រះរាជាណាចក្រកម្ពុជា ព្រះបាទសម្តេចព្រះបរមនាថ នរោត្តម សីហមុនី ប្រោសព្រះរាជទានព្រះរាជសារអបអរសាទរជូនចំពោះ ប្រធានាធិបតី នៃសាធារណរដ្ឋប្រជាមានិតចិន លោក ស៊ី ជីនពីង (Xi Jinping) ក្នុងឱកាសនៃខួបអនុស្សាវរីយ៍លើកទី៧២ នៃការបង្កើតសាធារណរដ្ឋប្រជាមានិតចិននិងបានបញ្ជាក់ថាកម្ពុជានឹងឈរប្រកៀកស្មារជាមួយចិនជានិច្ច។

ក្នុងព្រះរាជសារចុះថ្ងៃទី២៣ ខែកញ្ញា ដែលEAC News ទើបទទួលបាន ព្រះករុណាព្រះមហាក្សត្រ បានអបអរសាទរនូវសមិទ្ធផលនានាដែលបក្សកុម្មុយនិស្តចិន និងពលរដ្ឋចិនសម្រេចបានក្នុងរយៈពេល៧២ឆ្នាំមកនេះ ក៏ដូចជាសាទរដល់ប្រទេសចិនដែលបាន ចូលរួមក្នុងការប្រយុទ្ធប្រឆាំងការឆ្លងរាលដាលនៃជំងឺកូវីដ-១៩នៅក្នុងពិភពលោក។

ជាមួយគ្នានេះ ព្រះអង្គបានបញ្ជាក់ថាកម្ពុជានឹងនៅតែប្រកៀកស្មាជាមួយចិន និងជំរុញការកសាងអនាគតរួមគ្នាមួយជាមួយប្រទេសនេះផងដែរ។

ព្រះរាជសារ បានបញ្ជាក់បន្ថែមថា៖ « កម្ពុជា នឹងប្តេជ្ញាបន្តរក្សាចំណងមិត្តភាព និងកិច្ចសហប្រតិបត្តិការជាប្រពៃណីជាមួយចិន និងជំរុញការកសាងសហគមន៍កម្ពុជា-ចិន ជាមួយនឹងអនាគតរួមគ្នា » ។

ក្នុងពិធីប្រគល់និងទទួលកីឡាដ្ឋានជាតិមរតកតេជោកាលពីថ្ងៃទី១២ ខែកញ្ញា សម្ដេចតេជោ ហ៊ុន សែន បានលើកឡើងថាទំនាក់ទំនងជាផ្លែផ្ការវាងប្រទេសកម្ពុជានិងប្រទេសចិនគឺចាប់ផ្ដើមដោយសកម្មភាពរបស់អតីតអង្គព្រះមហាក្សត្រព្រះបាទនរោត្តមសីហនុ ដែលបានគាំទ្របក្សកុំមុយនីស្តចិនតាំងពីជំនាន់លោក ម៉ៅ សេទុង មកម្លេះ។

សាធារណរដ្ឋប្រជាមានិតចិនត្រូវបានប្រកាសនៅថ្ងៃទី១ ខែតុលាឆ្នាំ ១៩៤៩ នៅពេលដែលបក្សកុម្មុយនិស្តចិនដឹកនាំដោយលោក ម៉ៅ សេទុង ទទួលជ័យជម្នះទាំងស្រុងលើកងទ័ពសាធារណរដ្ឋចិនដែលដឹកនាំដោយលោក ចាង ខាយចៀក ហើយបានបង្កើតជាសាធារណរដ្ឋប្រជាមានិតចិនរហូតមកដល់សព្វថ្ងៃ៕